យល់ដឹងពីមាត្រាលើចរាចរណ៍ផ្លូវគោកដោយសង្ខេប ខែមករា 19, 2011
Posted by អែម ចាន់បុទុំ in ច្បាប់.Tags: ចរាចរ, ច្បាប់, ប៉ូលីស
10 comments
ប្រជាជនខ្មែរទូទាំងប្រទេស អ្នកណាក៏ដឹងដែរថានៅស្រុកយើងគឺផាកសម្បើមណាស់ ករណីខ្លះមិនដឹង ថាលោកបងប៉ូលីសយកពីណាមកទេ ចេះតែចាប់ ចេះតែចោទនេះនោះ ទាររកតែលុយ ដូច្នេះហើយកុំ ឱ្យបងៗប៉ូលីសជម្រិតយើងបានសូមមើលមាត្រាខ្លះដែលគេបានចែងក្នុងច្បាប់ចរាចរណ៍ផ្លូវគោក៖
មាត្រាទី ២៨៖ ក្នុងមាត្រានិយាយពី ការប្រើប្រាស់ភ្លើង និង សូរស័ព្ទយានជំនិះ
នៅពេលយប់ ឬពេលថ្ងៃពេលណាដែលមើលមិនឃើញច្បាស់ គ្រប់គ្រាន់ ដូចជានៅពេលភ្លៀងខ្លាំង ចុះអ័ព្ទ ឬឆ្លងកាត់ផ្លូវក្នុងរូងអ្នកបើកបរយាននៅលើទ្រូងផ្លូវ ត្រូវប្រើប្រាស់ភ្លើងសញ្ញាជាដាច់ខាត ។
មាត្រាទី ៥៣៖ និយាយអំពីការផ្ទុកទំនិញ និងមនុស្ស លើយានជំនិះ
ការរៀបចំផ្ទុកទំនិញ និងមនុស្ស ត្រូវអនុវត្តដូចខាងក្រោម៖
១- ការផ្ទុកទំនិញលើយានជំនិះ ត្រូវរបៀបចំឱ្យបានត្រឹមត្រូវដើម្បីការពារ
– ការបង្កគ្រោះថា្នក់ដល់មនុស្ស ឬធ្វើឱ្យខូចខាតទ្រព្យសម្បតិ្តសារធារណៈ ឬឯកជន ដោយការអូស ឬធ្លាក់តាមផ្លូវ ។
– ការបាំងភ្នែកអ្នកបើកបរ
– ការបង្កឱ្យមានសំឡេង ឬការបង្កើនធូលី ឬការធ្វើឱ្យរំខានផ្សេងៗទៀត
– ការធ្វើឱ្យបាំងភ្លើងស្តុប
២- ការដឹកជញ្ជូនមនុស្ស ត្រូវមានកៅអីអង្កុយ ឬមានបង្កាន់ដៃ ឬប្រដាប់តោងឈររឹងមាំ ហើយត្រូវឱ្យ មានផាកសុខភាពៈ
ការផ្ទុកមនុស្សត្រូវហាមឃាត់ដូចខាងក្រោម
– ហាមផ្ទុកមនុស្សហួសពីចំនួនកៅអី
– ហាមផ្ទុកមនុស្សលើដំបូល
– ហាមតោងពីមុខពីក្រោយ ឬចំហៀងរថយន្ត
– ហាមផ្ទុកមនុស្សនៅលើលើរ៉ឺម៉ក ឬសឺមីរ៉ឺម៉ក
– ហាមផ្ទុកវត្ថុដែលមានក្លិនអាក្រក់
និយាយរួមក្នុងមាត្រានេះ គ្មានបញ្ជាក់ថាម៉ូតូជិះបីនាក់អត់បានទេ គេគ្រាន់តែថាកុំឱ្យលើសចំនួនកំណត់ តាមពិតទៅម៉ូតូជិះត្រឹមគ្នាបីនាក់អត់មានអីហួសចំនួនកំណត់ទេ ។ ពេលប៉ូលីសផាកនិយាយពីមាត្រានេះ ឱ្យគាត់ស្តាប់ផង ។
មាត្រាទី ៧២៖
មន្ត្រី ឬភ្នាក់ងារនគរបាលទទួលបន្ទុកសណ្តាប់ធ្នាប់ចរាចរណ៍ណា ដែលប្រើសិទ្ធិអំណាច ដោយរំលោភក្នុងការដកហូតយក ប័ណ្ណបើកបរ ផ្លាកលេខ ប័ណ្ណសម្គាល់យាន ឬឃាត់ទុកយានរបស់អ្នក បើកបរ ត្រូវផ្តន្ទារទោស ដាក់ពន្ធនាគារពី ប្រាំមួយ(៦)ថ្ងៃ ទៅមួយ(១)ខែ ឬ/និងពីន័យជាប្រាក់ពី ពីរម៉ឺន ប្រាំពាន់រៀល (២៥.០០០ រៀល) ទៅ ម្ភៃម៉ឺនរៀល (២០០.០០០ រៀល) ។
ក្នុងករណីដែលមានការខូចខាត ឬបាត់បង់ផ្នែកណាមួយ នៃយាន បណ្តាលមកពីការឃាត់ទុក អង្គភាពសាម៉ីខ្លួនត្រូវទទួលខុសត្រូវក្នុងការសងខូចខាតនោះ ។ ប្រសិនបើកម្រិតនៃការបំពានករណីយ កិច្ច របស់មន្ត្រី ឬភ្នាក់ងារ ទទួលបន្ទុកសណ្តាប់ធ្នាប់ចរាចរណ៍ក្នុងការបញ្ចៀសនូវលទ្ធផលមានភាព ធ្ងន់ធ្ងរ នោះអង្គរភាពអាចទាមទារសំណងពីមន្ត្រី ឬភ្នាក់ងារនោះបាន ។
ត្រូវផ្តន្ទារទោស ដាក់ពន្ធនាគារពី ១ឆ្នាំទៅ ៣ឆ្នាំ ឬ/និង ពិន័យជាប្រាក់ពី ពីរលានរៀល (២.០០០.០០០ រៀល) ទៅ ប្រាំមួយលានរៀល (៦.០០០.០០០ រៀល) ចំពោះមន្ត្រី ឬភ្នាក់ងារទទួលបន្ទុក សណ្តាប់ធ្នាប់ចរាចរណ៍ណាដែលៈ
– បង្ខំទារប្រាក់ពិន័យមិនត្រឹមត្រូវតាមច្បាប់កំណត់
– ទទួលប្រាក់ដោយការប្រើប្រាស់ក្បាលសៀវភៅសម្រាប់ពិន័យ ដែលមានគល់បញ្ជីមិនត្រឹមត្រូវ ឬដោយមិនចេញបង្កាន់ដៃប្រាក់ពិន័យឱ្យអ្នកបើកបរដែលត្រូវពិន័យ ។
ពេលដែលយើងដឹងពីមាត្រានេះហើយ កុំខ្លាចពេលប៉ូលីសសម្លុត និយាយប្រាប់គាត់វិញបើគាត់អត់ដឹងពី ច្បាប់ ។ កាលពីឆ្នាំ ២០០៤ កាលនោះខ្ញុំជិះម៉ូតូឆ្លងភ្លើងស្តុមតែចៃដន្យអី ភ្លើងវាប្រែមកក្រហមប៉ូលីស កញ្ចែជ្រេសខ្ញុំភ័យណាស់ (ទើបមកពីស្រែ) គេថាផ្លាកលេខខ្ញុំក្លែងក្លាយ ពន្ធក្លែងក្លាយ ទៅអាឡូវសម្រួលគ្នា ឱ្យ ១០ដុល្លារមក (៤០០០០ រៀល) មែនតិចណា បើមិនចឹងទេអញអូសម៉ូតូអ្ហែងទៅ ប៉ុស្តិ៍ឥឡូវហើយ ហេតុតែខ្ញុំមិនដឹងច្បាប់ហើយទើបតែមកភ្នំពេញទៀតអង្វរគេសុំចុះត្រឹម ៣០០០០ រៀល អត់បាយបីថ្ងៃ ។ តែឥឡូវនេះវិញមិនងាយប៉ូលីសផាកបានទេ តែបើផាកក៏មិនអស់ច្រើនដែរព្រោះអីដឹង អស់ហើយពីច្បាប់ចរាចរណ៍ លែងឱ្យពួកគាត់កោរបានទៀតហើយ ។
អានផងដែរ៖
ប្រភព៖ ច្បាប់ចរាចរណ៍ផ្លូវគោកឆ្នាំ ២០០៧
អែម ចាន់បុទុំ 